فريج

ذاك الفريج اللي انت تغليه يايبه مريته .. شفته عدم شفته تراب ..

شفته بعيني بس النظر عيا يلامس مافيه ..

مشيــــــت

وانا اتخطرف والهوى شمال ..

والمسيان بالفضى بارد ..

غمضت عيني والشوق بحشاي ..

شفـــت

رمل عيا يبدل لونه ..

شفت سدره وباجي روشنه عتيجه ..

السدره ساقها بارض الوفا محفوظ ..

وهوى ديرتي يصبرها ويساحلها ..

والروشنه انحنى ظهرها ومالت ..

الوهن حالها ولا تقدر تشيل ..

شفت برمه جفت من سنين ..

وناقوط يرتجي قطرة حنين ..

وسراي عمت عينه من زمان ..

فيه سحر ما تهابه الروح ..

فيه عبره تقول وحاله يبوح ..

طفى نوري بعدهم وينهم هلي ..

وين اللي حملني وانا سهران ..

وينهم ناسي كنت احترق فرحان ..

وانا وياه اسألكم وينهم ؟




سليمان القصار